Воена интервенција против Северна Кореја би имала “уништувачки последици”, изјави денес за агенцијата АФП генералниот секретар на НАТО Јенс Столтенберг.
“Употребата на воена сила би имала уништувачки последици и мислам дека никој тоа не го посакува”, вели тој запрашан како ја коментира воената реторика на американскиот претседател Доналд Трамп околу северно-корејската криза.
“САД имаат право да се бранат и да ги бранат нивните сојузници. Но истовремено јас сум сигурен дека никој не сака воено решение.”
Трамп сурово реагираше на серија тестови на балистички ракети од долг дострел и нуклеарниот тест на Пјонгјанг опишувајќи го северно-корејскиот лидер како “лудак со нуклеарно оружје” и заканувајќи се дека ќе истури “оган и бес” врз Северна Кореја.
Првиот човек на НАТО патува во Јапонија и Јужна Кореја на крајот на октомври за да ја покаже поддршката за западните земји во оваа криза.
Според Столтенберг, потребен е економски притисок врз Северна Кореја:
“Треба економски притисок врз Северна Кореја, треба да се продолжи со користење на сите политички и дипломатски средства што ни стојат на располагање затоа што тоа што тие (северно-корејските лидери) го прават е опасно и е светска закана што бара светски одговор”, додаде шефот на НАТО.