Четири лица, вработени во Министестрството за надворешни работи, кои биле во Собрание за време на насилствата кои се случија на 27 април се суспендирани од работа и додека трае дисциплинската постапка која е поведена против нив тие ќе бидат суспендирани од работа.
Министерството за надворешни работи, на 7 јуни годинава, со допис побарало информации од Министерството за внатрешни работи, за можна вмешаност на вработени во МНР во насилствата што на 27 април се случија во Собранието.
„Министерството за внатрешни работи на Република Македонија, информираше дека по извршени проверки е утврдено дека за време на настанот во Собранието на Република Македонија на 27 април 2017 година е утврдено присуството на четири лица – вработени во Министерството за надворешни работи“, велат од МНР.
Од МНР оценуваат дека со нивните дејствија – односно нивното неовластено влегување и присуство во Собранието за време на настанот, постапувале спротивно на Етичкиот кодекс за вработените во МНР и го нарушиле угледот на професијата дипломат и воедно угледот на Министерството и државата.
Од министерството велат дека тоа е и прекршување на законите и Етичкиот кодекс на МНР.
„Врз основа на горе изнесеното, веднаш по добивањето на известувањето од МВР, против наведените е покрената дисциплинска постапка за дисциплински престап и до завршувањето на постапката тие се суспендирани од работа“, велат од МНР.