Во Министерството за внатрешни работи следењето на комуникациите се одвива исклучиво согласно процедурата пропишана во постојните законски и подзаконски акти, велат од МВР за НОВА ТВ по вчерашното обвинување на лидерот на опозицијата, Никола Груевски кој што обвини дека се прислушувани стотина членови на раководните органи на ВМРО-ДПМНЕ.
„Тоа што го прави МВР е легално и со наредба од суд преку Јавното обвинителство, а токму обвинителството е тоа што ги води истрагите. Нелегалното масовно прислушување, главната одлика на владеењето на Никола Груевски е предмет на истрага на СЈО. УБК и БЈБ постапуваат согласно своите надлежности и нивните активности во форма на оперативни акции и обработки во борбата против организираниот криминал, тероризмот, насилниот екстремизам и другите облици на противзаконско однесување се од доверлива природа и не се коментираат јавно. Работата на овие служби е насочена кон штитење на интересите и безбедноста на граѓаните и не се под контрола на ниту една политичка партија“, одговорија од МВР.
Додаваат и дека со промените во МВР и УБК една од основните цели била да се елиминираат идеолошките компоненти и од таа причина не станува збор за македонски екстремизам и тероризам. Од министерството велат дека УБК во своето работење е фокусирано на лев и десен екстремизам и радикализам, а тероризмот е посебен глобален феномен за кој и не треба посебно објаснување.
Од МВР потсетуваат дека во Собранието постојат две надзорни комисии чија функција е да вршат надзор над работата на УБК и АР и над примената на ПИ мерките.
„Тие комисии се добредојдени во секој момент да извршат надзор и контрола над примената на овие мерки“, велат од министерството.
Лидерот на ВМРО-ДПМНЕ , Никола Груевски вчера во специјалното издание на магазинот „Седмица“ на ТВ Алфа обвини дека членови на ВМРО-ДПМНЕ се прислушувани во последниот период.
„Во службата е отворено досие „Македонски екстремизам и тероризам“ службите имаат цел да прислушуваат 100 лица од ВМРО-ДПМНЕ. Ние немаме кому да се пожалиме за ова, затоа што според информациите што ги имаме засега, прислушувањето се врши во МВР, од луѓето кои работат таму. Ако сакаат да го демантираат тоа ќе треба да дозволат да се направи увид“, обвини Груевски.