Фудбалската Лига на шампиони на УЕФА вечерва влегува во „второ полувреме“ од групната фаза со дуелите од четвртото коло во А-Д конкуренциите. Епитетот дерби е за мечот во Рим каде Рома ќе биде домаќин на Челзи. Пресметката пред две недели на „Стемфорд Бриџ“ во Лондон заврши без победник (3:3), па основното прашање е дали Џеко и компанија ќе можат повторно да ги вознемират „сините“ на Антонио Конте и со евентуални три бода да направат голем исчекор кон осминафиналето.
Гостувањето на англискиот шампион на „Олимпико“ предизвикува големо внимание во италијанската јавност. Тамошните медиуми го насловија фудбалскиот судир во Вечниот град како меч на сезоната. „Волчицата“ очекува поддршка од 50.000 свои фанови од трибините на кои гледа како 12 играч во желбата за цел плен против Челзи.
„Игравме одлично во Лондон. Овојпај сме домаќини, очекуваме полн стадион и посакуваме победа“, најави белгискиот репрезентативец, Раџа Најнголан кој важи за алфа и омега во средниот ред на римјаните.
Александар Коларов, кој доби поштеда од Еузебио ди Франческо за средбата со Болоња викендот во Серија А, се враќа во тимот на Рома. Српскиот репрезентативец беше стрелец и асистент во ремито во првата средба со Челзи и неговото изземање од комбинација во саботата доволно говори за важноста на вечерашните 90 минути за римјаните. Но, посилни ќе бидат и „сините“. Конте на „Олимпико“ ќе смета на играчот за врска, Нголо Канте, а во меѓувреме се опорави Дени Дринквотер. Челзи е лидер во групата Ц со седум бода, два повеќе од Рома, и во случај на триумф во Рим ќе биде сигурен учесник меѓу 16 најдобри во елитното натпреварување.
Покрај Челзи, како осминафиналисти по четвртото коло би можеле да се промовираат уште Манчестер јунајтед, Базел, ПСЖ, Баерн Минхен, Барселона, Јувентус, Манчестер сити, Бешикташ, Тотенхем и Реал Мадрид.
Лига на шампиони – 4 коло
Вечерва играат
Група А
Манчестер јунајтед – Бенфика
Базел – ЦСКА Москва
Табела: Манчестер јунајтед 9, Базел 6, ЦСКА Москва 3, Бенфика 0.
Група Б
Селтик – Баерн Минхен
ПСЖ – Андерлехт
Табела: ПСЖ 9, Баерн Минхен 6, Селтик 3, Андерлехт 0.
Група Ц
Рома – Челзи
Атлетико Мадрид – Карабаг
Табела: Челзи 7, Рома 5, Атлетико Мадрид 2, Карабаг 1.
Група Д
Олимпијакос – Барселона
Спортинг Лисабон – Јувентус
Табела: Барселона 9, Јувентус 6, Спортинг Лисабон 3, Олимпијакос 0.