Сменетиот претседател на каталонската влада Карлес Пучдемон на прес конференцијата во бриселскиот Прес Клуб „Европа“ изјави дека во Брисел е на неопределено време и дека не бега од правдата.
Пучдемон истакна дека ќе се врати во Каталонија со одредени гаранции и напомена дека не е во Белгија за да бара политички азил.
Пучдемон вели дека ќе ги поддржи предвремените регионални избори на 21 декември кои ги распиша шпанската влада по примената на членот 155 од Уставот со што ја презеде директната контрола над Каталонија.
-Изборите на 21 декември претставуваат предизвик што ќе го прифатиме. Ние ќе ги почитуваме резултатите од изборите на 21 декември, како што тоа го правевеме и претходно.
Само сакам да ја прашам шпанската влада: Дали и вие че го направите истото? Сакам јасна посветеност на државата. Дали ќе ги почитувате резултатите или не?, праша Пучдемон на прес конференцијата, пренесува шпанскиот весник Паис.
Се истакнува дека на прес конференцијата на Пучдемон, која ја започнал со „добро утро’ на четири јазици, имало 150 новинари, иако има простор за само 50.
Паис објавува дека Пучдемон во Брисел пристигнал со седуммина сменети каталонски министри.