Грег Попович ја впиша 500. гостинска победа во НБА лигата. За јубилејната бројка на легендарниот тренер му беа потребни 835 меча. Ја прослави во мечот со Далас што неговиот Сан Антонио го доби со 97:91.
Ламаркус Олдриџ беше лидер на спарси против една од најслабите екипи во НБА лигата со 32 поена кон кои додаде пет скока и четири асистенции. Одлично го следеше Пети Милс кој уфрли 19 коша. Прво име во поразената екипа беше новајлијата во најсилната кошаркарска лига, Денис Смит Џуниор со 27 поени.
Бостон изгледа како казнена експедиција во овој период од сезоната. „Селтикси“ го забележаа и 13 триумф едноподруго, а нивна жртва ноќеска беше составот на Бруклин (109:102).
Кајри Ирвинг се врати со ростерот на Бред Стивенс и веднаш се промовира во лидер на „зелено-белите“ на паркетот. Дуелот со „мрежичките“ го заврши со 25 поени пришто најголема поддршка имаше од Маркус Морис чиј краен ефект беше 21 кош и 10 скока. Џо Херис беше најзабележителен кај домашните со 19 поени.
Торонто приреди изненадување со победата над Хјустон со 129:113. Ниту 38 поени, 11 додавања и шесте скока не беа од корист на „ракетите“ да избегнат пораз од репторси во чии редови најистакнати беа Дероузан со 27 коша и Лоури со 19.
НБА лига – резултати
Далас – Сан Антонио 91:97
Бруклин – Бостон 102:109
Хјустон – Торонто 113:129