Селекторот Јорданчо Давитков ја собра кошаркарската репрезентација на Македонија за мисијата ЕП 2021, но поради очајните настапи во изминатите две години ќе мора да мине трнлив пат за место на завршниот турнир. „Црвено-жолтите“ овојпат почнуваат од претквалификациите во кои за ривали во групата ги имаат Словачка и Швајцарија. Првиот настап е веќе во недела (18 ч.) во Попрад против Словаците, три дена подоцна националниот тим ќе биде домаќин на Швајцарците.
„Ова е нов почеток за чекор напред по двете лоши лета за македонската кошарка. Претквалификациите ги почнуваме со Словачка, доста незгодна селекција, со која неодамна одигравме два меча. Треба добро да се подготвиме оти сите сме свесни за незавидната позиција во која западнавме. Притисок е присутен што е нормално. Знаеме што значи, но овојпат навистина мораме“, порача Војдан Стојановски, капитен на репрезентација по денешниот собир во Скопје.
На првиот рапорт кај селекторот Јорданчо Давитков се појавија 15 кошаркари. На располагање се ставија Дамјан Стојановски, Војдан Стојановски, Александар Костоски, Бојан Крстевски, Ненад Димитриевиќ, Дарко Соколов, Димитар Караџовски, Бобан Стајиќ, Адем Мекиќ, Андреј Магдевски, Стојан Ѓуроски, Кирил Николовски, Љубомир Младеновски и Бојан Трајковски. Но, кратко по појавување Трајковски го напушти друштвото. Од комбинација за неделниот дуел во Попрад, поради повреди, отпаѓаат ветераните Ѓорѓи Чековски и Димче Тасовски, а во циклусот се влекува и без натурализиран репрезентативец.
„Дефинитивно ќе играме без странец. Ќе видиме каква ќе биде повредата на Чековски од што ќе зависи и неговиот статус. За Трајковски знам дека треба да биде дел од нас, но не знам зошто не тренира сега. Репрезентацијата ќе биде подмладена со кошаркари кои треба да прераснат во лидери во иднина. Решени сме да одиграме најдобро што можеме и знаеме, а што тоа ќе донесе ќе видиме по двата натпревара што следуваат“, истакна селекторот Давитков.
По дуелите со Словачка во недела во гости и со Швајцарија во среда на домашен терен, ќе следува тримесечна пауза во циклусот. На 25 февруари догодина е закажан реваншот со Словаците, а на 28 јуни и со Швајцарците.