Металург загуби во последниот настап од групната фаза во ракометната Лига на шампиони за оваа сезона. Спортинг во Лисабон го совлада тимот од Автокоманда со 31:27 во меч што, освен престиж, немаше значење за конечниот изглед на табелата во Д конкуренцијата.
Македонскиот вицепрвак повторно одигра добро и лошо полувреме што влијаеше на крајниот резултат да биде каков што е. „Металурзи“ беа подобар ривал во првиот дел во кој во десеттата минута водеа со 1:5, во 14. и со 3:6. Домашните, сепак, успеаја да фатат чекор, па и да поведат со два разлика (11:9) во 25 минута. На тоа тимот на Александар Јовиќ одговори со серија од 3:0 за враќање во позитива (11:12) и со реализациите на Димитриевски и на двапати Токиќ што следуваа ги „заклучи“ воведните 30 минути со 12:15.
Почетокот на продолжението му припадна на Спортинг Лисабон. Португалците направија 5:2 во шесте минути по враќање од соблекувална и израмнија на 17:17. Илиќ набрзина „врза“ два гола за Металург за 17:19 во 37 минута и по што вицешамионот западна во „црна дупка“ и до 42 минута прими пет гол, а не постигна ниту еден (22:19). На трите гола за израмнување (22:22) дозволи нови три во низа во сопствената мрежа (25:22) по што ја загуби и конкурентноста за бодови до крај на средбата, патем, во 49 минута, остана и без Дарко Димитриевски кој поради три исклучувања мораше да се пресели на трибините.
Карлос Руесга Пасарин со седум гола беше најефикасен ракометар во натпреварот, Портела и Марцо додадоа по шест за домашната екипа колку и Вања Илиќ, првиот стрелец на металурзи на гостувањето во Португалија.
Спортинг Лисабон – Металург 31:27 (12:15)
Сала: „Жоао Роша“ во Лисабон. Гледачи: 415. Судии: Ференц Бониферт и Виктор Олах (двајцата од Унгарија). Ц. картон: Димитриевски (Металург).
Спортинг Лисабон: Чудиќ (10 одбрани), Гашпар, Валдез 1, Портела 6, Копчо 2, Бјелановиќ, Пасарин 7, Марцо 6, Сола 2, Роша, Карнеиро 2, Тавареш, Арухо 1, Никчевиќ 2, Божовиќ 1, Борхес 1. Тренер: Уго Канела.
Семерци: /. Исклучувања: 10 минути.
Металург: Томовски, Арсиќ (4 одбрани), Петров, Јагањац 2, Токиќ 4, Кузмановски 5, Илиќ 6, Анѓелиќ 3, Велковски 3, Пешевски 1, Палевски, Гуглета 1, Димитриевски 1, Арсеновски 1. Тренер: Александар Јовиќ.
Седмерци: 2/3. Исклучувања: 14 минути.