Уште еден рекет со тежина на гренслем трофеј со враќа на тениските терени. Марион Бартоли (33) реши да ја прекине пензијата и да се врати на ВТА турот. Кам-бекот е најавен за средината на март, а поранешната шампионка на Вимблдон планира да настапи на Мастерсот во Мајами.
„Се враќам. Ќе биде голем предизвик. И натаму тренирам и планирам да се вратам во Мајами. Едвај чекам да излезам на терен и да ја почувствувам вашата поддршка, пред се, во Париз, на Ролан Гарос, но и на Вимблдон и во Федерејшн купот. Се гледаме“, возбудено порача Бартоли.
Бартоли се повлече во 2013 година, еден месец по триумфот на Вимблдон. По четири години пауза, некогашната седма светска тенисерка во сингл и 15 . во дубл, се реши за активно враќање во „белиот спорт“. Французинката имаше проблеми со мистериозна болест поради што се „стопи“ за 20 килограми. Докторите и препорачаа да конзумира само органска храна, а покрај тоа стана и премногу сензитивна на се вклучувајќи и електрични уреди.
„Ужасно е. Мојот живот се претвори во ноќна мора. Ова низ што минувам не го посакувам никому. Не можам да користам ниту влажно хартиено марамче да се избришам, се туширам со минерална вода бидејќи не смеам да користам обична. Не можам на телефон подолго од пет минути бидејќи срцето почнува силно да работи. Секој пат кога ќе направам нешто стравувам за реакцијата. Живеам во постијан страв“, се отвори во една прилика Бартоли.
Сега, според фотографиите што ги постира на социјалните мрежи се чини дека е се во ред. Дали ќе може да постигне значајни резултати во тенисот останува да причекаме на 2018 година.