Доживотни суспензии за уште 11 руски спортисти денеска изрече Интернационалниот олимписки комитет (ИОК). Одлуките се образложени се прекршување на правилата за допинг за време на зимската Олимпијада во Сочи во 2014 година, но и претходно.
Со острата мерка се опфатени Иван Скобрев, носител на две медали во брзо лизгање од Игрите во Ванкувер во 2010 година, како и неговиот колега Артем Кузнецов.
Суспензија е изречена и за Татјана Иванова и Алберт Демченко, освојувачи на сребрени одличја во санкање во Сочи, за крос-кантри скијачите Никита Кроков, Александар Бесмертњих и Наталија Матвеева, за олимпијците во боб – Људмила Удобкина и Максим Белугин и хокеарките Татјана Бурина и Ана Шухукина.
Сите остануваат без освоените медали и добија забрана за учество на сите олимписки игри во иднина, стои во дописот на Дисциплинската комисија при ИОК. Одлуките се донесени во рамки на истрагата за допинг на руските спортисти на Олимпјадата во Сочи.
Претходно ИОК донесе одлука за суспензија на Русија и од Игрите во Пјонгчанг во февруари во 2018 година. На Олимпијадата во Јужна Кореја, сепак, ќе може да настапат оние спортисти од земјата кои ќе добијат покана и тоа во неутрална форма, односно, без руското знаме и без интонирање на националната химна во случај на освојување на златен медал.