Судијата во предметот „ТНТ“ на Специјалното јавно обвинителство го одби барањето на адвокатите кои го застапуваат екс премиерот, Никола Груевски, на медиумите да им се забрани да направат видео снимки пред почетокот на денешното судење. И покрај нивното барање судот сепак им дозволи на медиумите да направат инсерти од обвинетите на обвинителна клупа.
-Наместо со професионални камери кои ќе се во согласност со законската процедура, овде во судница обвинетиот Никола Груевски го снимаат некакви свадбарски камери, рече во судница адвокатот Димитар Дангов.
Со тоа почна судењето за уривањето на комплексот „Космос“, во сопственост на бизнисменот, Фијат Цановски. Судењето ќе се снима тонски и визуелно.
Во овој предмет обвинети се седум лица меѓу кои, поранешниот премиер Никола Груевски, поранешниот министер за транспорт и врски Миле Јанакиески и поранешниот градоначалник на Гази Баба, Тони Трајковски.
Со новиот годишен распоред предметот „ТНТ“ е распределен кај судијата Огнен Ставрев.
Советот за оценка на обвинителен акт при Кривичен суд на 17 ноември минатата година го прифати обвинението за случајот „ТНТ“.
Апелацискиот суд на 4 ноември минатата година одлучи прислушуваните разговори во случајот „ТНТ“ за уривањето на комплексот „Космос“ да можат да се користат како докази во судската постапка.
Адвокатите на Груевски исто така имаа забелешки и за снимките од т.н. „бомби“ и ги побараа да им бидат доставени како доказ. Судијата Огнен Ставрев им укажа дека нема ништо да им сокрие и дека ќе им бидат доставени сите докази. Во судница присутни се сите обвинети, како и оштетениот Фијат Цаноски.
Обвинителите од СЈО на јавна седница изјавија дека Груевски и Јанакиевски не се жртви на прислушкување, туку тие биле дел од власта што незаконски прислушкувала. Според обвинителите снимките имаат доказна вредност и со нив не се повредува приватноста на обвинетите.
Адвокатите на обвинетите сметаат дека прислушкуваните разговори се незаконски стекнати и со нив се нарушува приватноста на обвинетите.