Парламентарната група од Советот на Европа бара формирање на независен орган кој ќе врши надзор на фудбалските организации, јавува МИА.
„Премалку пари е штетно за фудбалот, а премногу пари го убиваат“, потенцираше денеска пратеничката од Луксембург, Ан Брасер.
Резолуцијата која предвидува основање на овој орган е усвоена со 131 глас за, пет против и 10 воздржани.
Новиот орган ќе врши контрола врз работата на ФИФА и УЕФА.
„Потребни се длабоки реформи на сите управувачки нивоа, фокусирање на принципите на интерна демократија и партиципација, транспарентност и одговорност, солидарност и грижа за општи добра. Засегнатите страни мораат да соработуваат за расчистување на финансиските екцеси кои му нанесуваат штета на фудбалот, смета таа.
Пратеничката побара од фудбалските организации да организираат тркалезна маса и да дискутираат за финансискиот фер-плеј, сопственоста над играчите, менаџерите и други прашања.