Најмалку 40 лица загинале, а десетина се повредени во пожар кој ова утро избил во болница во Јужна Кореја, објавија локалните пожарникари.
Пожарот се случил на првиот кат во болницата Седџонг, во југоисточниот град Мирјанг, во собата за итни случаи.
Локалните пожарникари објавија дека ситуацијата многу бргу се менува, односно дека се очекува зголемување на бројот на жртвите.
Пожарникарите евакуирале околу 200 лица кои се наоѓале во главната зграда на болницата.
Премиерот на Јужна Кореја наредил да се употреби целата возможна опрема и персонал за гасење на пожарот, односно што побргу да се пребара болницата за да се спасат што повеќе животи.
Станува збор за најсмртоносниот пожар во Јужна Кореја во последните десет години. Трагедијата се случи еден месец по пожарот во Фитнес клуб во Чечхон, каде што загинаа 29 лица.
Пожарникарите за медиумите изјавиле дека жртвите починале од задушување, а наведено е и дека неколку повредени се во критична состојба.
Причината за пожарот се уште не е позната.