Судењето за предметот „Тенк“ на СЈО во кој обвинети се поранешниот премиер Никола Груевски, поранешната министерката за внатрешни работи Гордана Јанкулоска и поранешниот помошник министер во МВР Ѓоко Поповски, за набавката на луксузниот мерцедес вреден 600 илјади евра, е одложено за 12, 13 и 16 февруари.
Судијката Добрила Кацарска го прифати барањето на адвокатот Богољуб Софрониевски за одложување на рочиштето, бидејќи немал доволно време за подготовка, имајќи предвид дека и вчера бил ангажиран како бранител на Ѓоко Поповски.
Адвокатот на Груевски и на Јанкулоска, Димитар Дангов даде приговор во однос на тонското и визуелно снимање на рочиштето за главниот претрес и додаде дека тоа не е во согласност со член 374 од ЗКП. Според него, начинот на кој се снима судењето не е според АКМИС системот.
Судијката Кацарска, пак, рече дека дека неможноста камерите да бидат поврзани со АКМИС системот не значи дека судењето се снима спротивно на законот.
Обвинителот од СЈО Трајче Пеливанов посочи дека сите обвинети мора да ги добијат своите права, но тоа да не се случува во иднина, бидејќи се одолговекува постапката.
Пред почетокот на рочиштето адвокатите на обвинетите до судот доставиле докази за овој случај.
На почетокот на рочиштето судијката Кацарска го предупреди Груевски да не доцни на судењето, откако тој пристигна во судницата 8 минути подоцна од закажаниот почеток.
Според обвинението, што во судот го застапуваат обвинителите Трајче Пеливанов и Елизабета Јосифовска, во периодот од февруари до крајот на октомври 2012 година, Никола Груевски како службено лице ги искористил влијанието и службената положба и побарал од министерката за внатрешни работи Гордана Јанкулоска, да спроведе јавна набавка во која Министерството ќе купи ново блиндирано патничко моторно возило „мерцедес“, модел „С-600 гард“, а во постапката бил фаворизиран економскиот оператор М.А. ДООЕЛ, генерален застапник и дистрибутер на возилата од брендот „Мерцедес“.
Јанкулоска за да го исполни барањето, пак, го поттикнала обвинетиот помошник-министер Ѓоко Поповски да стори кривично дело злоупотреба на службената положба и овластувањето. Возилото од Министерството требало да се даде на користење и на Груевски кој сакал да користи такво ново блиндирано патничко моторно возило, но за тоа не сакал во јавноста да се дознае.
За набавката на мерцедесот јавноста дозна од разговорите кои ги објави опозицијата.
Апелацискиот суд Скопје на 8 ноември одлучи прислушуваните разговори за набавката на мерцедесот да бидат доказ во судењето за случајот „Тенк“.