Во разговор со Борјан Јовановски, поранешната амбасадорка во Македонија, Теодора Гросоманиду вели решение за името е можно пред јуни годинава.
Коментирајќи го прогресот во спорот за името, според неа, во моментов има позитивна клима од двете страни, а неодамнешните протести кои се случија во Атина носат само непотребна политичка цена.
Екс-амбасадорката смета дека Грција воопшто не треба да стравува од иредентизам од македонската страна бидејќи Македонија го има променето Уставот и извадени се сите референци кои можат да се однесуваат на припојувања територија од Грција или било кој друг сосед, а исто така Времената спогодба тоа го гарантира.
Според Гросоманиду, во решението најверојатно ќе се содржи терминот „Македонија“ или на кирилица или на англиски, а тоа е она што не им се допаѓа на грчките националисти, кои не сакаат да се употреби тој збор за да се исклучи националната димензија на државата.
Гросоманиду беше разрешена од функцијата амбасадорка во Македонија во 2007 година, три месеци пред завршување на мандатот, откако во изјава за британскиот весник „Фајненшл Тајмс“ изјави дека „Грција е должна да се соочи со новата реалност – а тоа е фактот дека повеќе од половина членки на Обединетите нации ја признале земјата под уставното име“.