Основното јавно обвинителство Скопје и Основното јавно обвинителство Велес отворија постапка за силуваното 13 годишно девојче од Домот за деца 25 мај.
,,Во Основното јавно обвинителство Скопје се оформени предмети по писмени известувања поднесени од Министерството за внатрешни работи по кои обвинителството постапува.
Доставена е Наредба за проверка на наводите од пријавите и за организацијата и работењето во установата. Повикани се и се врши сослушување на повеќе лица кои можат да придонесат кон утврдување на фактите и за кривичната одговорност. Во врска со последните информации кои се однесуваат на поголем број штитеници од установата, Обвинителството достави писмено барање до Министерството за труд и социјална политика со цел прибирање на потребни податоци“, соопштија од Обвинителството.
Постапка е поведена и за кривичната пријава која СВР Велес ја поднесе вчера за полов напад врз дете против 18 годишен велешанец.
,,Основното јавно обвинителство Велес, по применото известување, веднаш издаде Наредба за телесен преглед до Институтот за судска медицина. Во текот на вчерашниот ден до Обвинителството од страна на Министерството за внатрешни работи е пристигната кривична пријава против конкретен сторител. Постапката интензивно ќе продолжи со расветлување на настанот се до донесување на јавнообвинителска одлука“, велат од Обвинителството.
Во Основното јавно обвинителство Скопје предмет е отворен и по поднесена кривична пријава од страна на родителите на девојчето, преку адвокат, за кои информираше НОВА.
Со оваа кривична пријава се бара одговорност против лица вработени во Јавната установа за згрижување деца со воспитно – социјални проблеми и нарушено поведение – Скопје, а за сторени кривични дела – Злоупотреба на службена положба и овластување и Несовесно работење во службата од Кривичниот законик. Оваа кривична пријава беше поднесена на 1 август минатата година, од Европскиот центар за права на Ромите.
13 годишното малолетно девојче Р.И згрижено во Домот 25 мај, неколкупати било сексуално злоставувано. Од Европскиот центар за права на Ромите обвинија дека одговорните лица од домот за згрижување деца , полицијата и обвинителството не реагирале навремено да ги истражат и спречат наводите за сексуална злоупотреба на малолетничка. Алармот беше вклучен дури откако во јавноста беше обелоденето дека малолетничката абортирала по забременување од сексуално насилство.