Министерката за труд и социјална политика Мила Царовска најави дека денеска ќе се знае дали и кој ќе понесе одговорност.

Ниту една институција не реагирала на случајот со малолетното девојче од Домот за деца „25 Мај“ во Скопје, кое било неколкупати сексуално злоставувано.

Алармот бил вклучен уште на 1 август минатата година кога Европскиот центар за права на Ромите доставиле кривична пријава до Основното јавно обвинителство, со која барале да се утврди одговорност  од домот, старателот на девојчето, но и кривично да се гонат одговорните за сексуалното изживување врз детето.

Сенада Сали од ЕЦПР за Нова ТВ, вели дека обвинителот и рекол дека била дадена наредба до надлежен инспектор од МВР да изврши истражување во Домот за деца. Но , тука завршило се.

Од тогаш  поминале повеќе од 6 месеци, а се уште не е покренато обвинение против никого. И додека институциите си ја префрлале одговорноста и ниту една не презела било каква реакција , хоророт продолжил.

Девојчето, кое во меѓувреме го префрлуваат во домот за згрижување „Ранка Милановиќ“, останува бремено како резултат на сексуално насилство.

Поради игнорантскиот однос на јавното обвинителство, ЕЦПР доставиле и приватна тужба до судот со која бараат исто така да се утврди одговорност од домот, старателот и силувачите. Тужбата е поднесена на 17 јануари, а како баратели се потпишани родителите на девојчето.

За кошмарот што го доживело девојчето, биле информирани и во Центарот за социјални работи од каде била побарана помош за покренување на кривичната пријава. Но, од таму одговориле дека не утврдиле никаква одговорност  во Домот „25 мај“.

Писмото што го испратиле до ЕЦПР  е со датум од 23. мај 2017 година во кое пишува:

„Во врска со поднесено барање за поведување на судска постапка против старателот на детето и против домот домот за деца без родители: непостои неправилно постапување од страна на поставениот старател и од страна на одговорните лица во домот за деца без родители 25 мај, Бутел, Скопје“.

Со ова, државата која требала да го штити малолетното дете, неколкупати потфрлила. Не само што дозволила под нејзина „заштита“ девојчето да биде злоупотребувано и злоставувано, туку и било ускратено и правото за било каква правна помош.

Државното старателство во ниту еден случај не може да значи само храна и покрив на глава, уште повеќе кога се знае дека се работи за малолетни деца кои се напуштени од родителите.

Кога државата ја презема одговорноста за грижа и заштита на дете, сместувајќи го во установа од ваков тип потребно е во континуитет да се преземаат мерки за заштита на правата на детето и превенција од секаков вид на злоупотреба, занемарување или малтретирање, вклучувајќи и сексуална експолатација, а на што впрочем упатува и член 19 од Конвенцијата за правата на детето, констатира Народниот правобранител.

„Народниот правобранител заради утврдување на состојбата ги посети Јавните установи за згрижување на деца со воспитно – социјални проблеми и нарушено поведение ’25 Мај’ и ‘Ранка Милановиќ’, при што изврши увид во документацијата и разговараше со одговорните лица, како и со малолетничката. Притоа неспорно констатира дека станува збор за дете во ризик, на чии родители им е одземено родителското право ѝ е под старателство на ЈУ Меѓуопштинскиот центар за социјална работа на град Скопје. Во горенаведената институција детето е сместено од декември 2016 година и повеќе пати, според негово кажување, самоволно ја напуштала институцијата. За Народниот правобранител неспорно е дека наведените установи се од отворен тип што значи дека штитениците во секое време можат да ја напуштат установата. Но, со оглед на тоа што станува збор за деца во ризик со назначен старател од државен орган смета дека надлежните затаиле во овој случај. Наведеното од причина што не покажале интерес да ги утврдат причините за честото напуштање на домот од страна на малолетничката, како и за тоа каде и со кого го поминувала времето по напуштање на Установата“, се вели во соопштението на Народниот правобранител.

Случајот со 13 годишното девојче, во јавноста го обелоденија од ЕПЦР .

-На 1 март 2017 година, ЕЦПР добиле информација од нејзините родители дека девојчето исчезнало од домот „25 Мај“. „Одговорните лица не го пријавиле нејзиното исчезнување ниту во полиција, ниту на нејзините родители. Според нејзиното сведочење, пред откриеното сексуално злоставување на ромски девојки под државна заштита во Македонија, девојката била принудно земена од страна на постар маж од институцијата, кој со возило ја одвел во неговиот дом во друг град. Таму, таа била принудена на сексуални односи и физичка работа. Успеала да избега по 30 дена и да се качи на автобус за Скопје каде полицијата ја нашла на Бит-пазар, наведуваат од организацијата.