Министерството за внатрешни работи го зголемило бројот на полициски патроли во неколку реони низ државата, по вчерашното донесување на Законот за употреба на јазиците, кое помина во бурна и тензична атмосфера, во која за влакно беше избегната и физичка пресметка меѓу поранешниот лидер на ВМРО-ДПМНЕ и актуелен пратеник, Никола Груевски и претседателот на Собранието, Талат Џафери.
Засилените мерки следуваат и по заканите упатени кон пратениците на СДСМ и коалицијата поради гласањето на Законот. Ноќеска како што информираше МВР, бил запален и автомобилот на пратеничката на СДСМ, Славица Шуманска – Митева во Виница.
„Врз основа на безбедносните проценки МВР ги презема неопходните мерки за гарантирање на сигопрноста и безбедноста на граганите и државата. Во текот на вчерашниот ден согласно безбедносните процнески беше зголемен бројот на полициски патроли во неколку реони низ државата. МВР ги следи тековните случувања и се прават редовни безбедносни проценки врз основа на кои се преземаат соодветни мерки“, соопштија за НОВА од МВР.
Пратеникот Павле Богоевски, кој е дел од коалицијата на СДСМ, за НОВА вели дека пратениците немаат полициска заштита во класична смисла, но можно е и најверојатно има засилени полициски патроли.
Полицијата во меѓувреме трага по лицата кои ноќеска го запалиле автомобилот на Шуманска – Митева и работи на расчистување на случајот. Инцидентот се случил околу 1.30 часот на улицата Славчо Стојменски во Виница.
МВР соопшти дека непознати сторители го искршиле стаклото на автомобилот „сеат леон“ на пратеничката, ја полеале внатрешноста со запалива течност и го запалиле.
Пратеничката Шуманска – Митева во изјава за „Фокус“ вели дека зад синоќешниот инцидент стојат вандали охрабрени од вчерашното однесување на пратениците на ВМРО-ДПМНЕ во Собранието, кои се обидуваа да го спречат гласањето за Законот за јазиците.
Таа додава дека изминатиов период добивала закани, но вели дека не очекувала вакво нешто.
-Имаше закани по пораки, но ниту на сон не верував дека ќе се случи вакво нешто. Очигледно имаат храброст, но не им се плашам. Ова е кукавички чин, не е во ред да прават вака среде ноќ.Ова е чист вандализам-вели пратеничката на СДСМ, Шуманска – Митева.
МВР денеска соопшти и дека на вчерашниот протест пред Собранието против Законот за јазиците било приведено 27-годишно момче, кај кое биле пронајдени пендрек и камења.