Опозициската ВМРО ДПМНЕ, како реакција на обраќањето на премиерот Зоран Заев, денеска повтори дека Законот за употреба на јазиците е неуставен, неприменлив и штетен.
-Како што ќе минува времето неговата лага ќе стане се поочигледна. Исто како и лагите од предизборието дека двојазичноста била само во главите на вмровците. Доколку имаше малку доблест денеска ќе се извинеше и ќе се срамеше за тоа што вчера ја силуваше демократијата, го погази деловникот и го прекрши Уставот. Тоа не му го кажува само ВМРО-ДПМНЕ, туку и експертската јавност и граѓаните. Сите нив Зоран Заев ги игнорираше и не дозволи никаква дебата за овој противуставен закон кој на сила го донесе, се вели во соопштението од ВМРО ДПМНЕ.
Според опозициската партија, „насилното носење на овој закон покажа дека не постои никаков концепт на едно општество за сите, туку концепт на одржување по секоја цена на владината коалиција, спротивно на интересите на граѓаните“, при што се истакнува дека „овој закон не е закон за употреба на јазиците, туку е закон за двојазичност и тоа не е воопшто во духот на едно мултиетничко општество какво што е Македонија“.
-Овој закон беше донесен шверцерски со злоупотреба на европското знаменце, иако и амбасадори и европски авторитети јасно кажаа дека нема никакво реформско значење во нашата евроинтреграција, велат од ВМРО ДПМНЕ, при што се истакнува дека поради ова власта многу скоро ќе понесе одговорност.