Премиерот Зоран Заев, во првата своја јавна реакција по вчерашното донесување на Законот за употребата на јазиците, во видео обраќање вели, Законот за употреба на јазиците претставува сериозен придонес во градењето на концептот „Едно општество за сите граѓани“.
Заев додава дека се работи за закон за кој мнозинството граѓани на Република Македонија ја дале својата поддршка на парламентарните и локалните избори.
„Оваа наша и европска вредност, ја доби поддршката од мнозинството граѓани на последните парламентарни, но и на локалните избори. Се определивме за политики што ја градат Република Македонија како граѓанска држава на сите кои живеат во неа: Македонци, Албанци, Турци, Срби, Власи, Роми, Бошњаци и сите други заедници. Овој закон е целосно во согласност со Уставот и амандманот 5, донесени пред 17 години. Никој не е и не може да биде над Уставот“, вели Заев меѓу другото во обраќањето.
Тој потенцира дека претстојниот период, треба да се комплетираат реформите и да напредува економија, а дека во интерес на граѓаните е понатамошен развој на државата.
Ова обраќање на Премиерот следи по вчерашното гласање за Законот за употреба на јазиците, кое се одвиваше во тензична атмосфера, а во која за малку се избегна инцидент помеѓу собранискиот спикер Талат Џафери и поранешниот премиер Никола Груевски, кој на Џафери му рече дека не треба законот да се носи на сила.
И покрај тоа што Џафери два пати напомена дека законот е веќе донесен, пратениците од ВМРО-ДПМНЕ, вчера, останаа во собраниската сала тврдејќи дека тие не го признаваат законот, особено затоа што Џафери го прекршил Уставот, недозволувајќи расправа за нивните амандмани.
Се уште неизвесно е и како би стапил законот на сила, откако претседателот Ѓорѓе Иванов рече дека нема да го потпише, иако според Уставот, нема право на второ вето.