Претседателот на Владата, Зоран Заев денеска најави дека ќе има реконструкција на Владата и дека почнуваат разговори за зголемување на парламентарното мнозинство.
„Веројатно ќе разговараме со сите опозициски политички партии, освен со ВМРО-ДПМНЕ“, рече Заев по денешниот Форум за владеење на правото во ЈИЕ.
Реконструкцијата, како што објасни тој, ќе бидат договорите со политичките партии и пратениците кои би ја прифатиле владината програма за влез во парламентарното мнозинство.
Тој смета дека ваков процес би значел сериозна порака до граѓаните, до стопанството, до општеството дека Владата има намера преку посилно и стабилно мнозинство во Собранието да носи сериозни одлуки во Република Македонија, кои, како што рече, се на повидок и доаѓаат.
„Апсолутно ќе разговараме со сите кои имаат намера да поддржат концепт на едно општество за сите, оние кои се придржуваат до вредностите на ова владејачко мнозинство, а тоа апсолутно со Законот за јазиците е определено во кој правец ќе се движиме“, изјави Заев.
Тие што според него не даваат шанса, нема ни да бидат вклучени во преговорите. Заев дополни и дека добро одат работите кон измени во Законот за политички партии.
„Во рамки на изборното законодавство јас го соопштив нашиот концепт, дека се залагаме за една изборна единица, професионални институции, ДИК да биде административен орган, а политичките партии да учествуваат шест месеци пред изборите“, рече Премиерот.