Вечерва, група од 40 тина лица се собраа пред домот на пратеничката од СДСМ Фросина Ременски која е и потпретседателката на Собранието, негодувајќи поради гласањето за Законот за јазици. Групата упатувала закани и навреди кон Ременски и нејзиното семејство.
Ременски најави дека ќе поднесе кривична пријава против демонстрантите кои, како што таа тврди, се членови на ВМРО ДПМНЕ.
„ Во координирана организација со ВМРО-ДПМНЕ, ОК на нивната партија од Карпош на чело со поранешниот и сегашниот претседател на ОК Карпош Сашо Лазаревски и Тони Јаревски (актуелен советник во Карпош), заедно со позната група на партиски активисти вечерва “протестираа” со отров во устата и душата пред мојот дом.
Нема да чекам никој да поднесе кривична пријава. Тоа ќе го направам јас лично со се што поседувам како доказ за кажаното.
Тој фашизам и безобразлук ќе си го практикувате дома, зошто кај мене нема да ви помине.
Од вечерва сум и Македонка, и Албанка, и Турчинка, и Ромка, и Босанка, и Влаинка и Србинка …, викајте ме како сакате, затоа што знам дека, им сакам добро на сите без разлика на вера и етничка припадност.
Вие сте вистинските и упорните гробари на иднината и мирот на земјата и верата во која се колнете !“ напиша Ременски на својот фејсбук профил.
Претходните денови се протестираше и пред домовите на пратениците на СДСМ од Прилеп и Велес, а беше запален автомобилот на пратеничката на СДСМ од Виница.
Претседателот на ВМРО ДПМНЕ Мицкоски денеска негираше дека неговата партијата ги организира протестите пред домовите на пратениците.
„Навистина е жално да се гледа тоа што се случува во моментот во Македонија, некој тоа го испровоцира. Јас апелирав да не дозволиме да се случи оваа ситуација, но некој тоа не успеа да го препознае. За жал тие луѓе денес се премиери, министри, претседатели така наречени на Собранието и целата одговорност е кај нив за оваа новонастаната ситуација. Гледам дека полициски сили ги чуваат домовите на пратениците од СДСМ, од владејачкото мнозинство и навистина ние како политичка партија не можеме да оправдаме било какво насилство“ изјави денеска Мицкоски.