Почетокот на главната расправа од судскиот процес за случајот „Таргет-Тврдина“ на СЈО се одложи за 15 мај, бидејќи се уште се чека екстрадицијата на двајцата обвинети поранешни началници во УБК, Горан Грујевски и Никола Бошковски за кои се води постапка во Врховниот суд на Грција.
Судот, на денешното рочиште, најави дека ќе биде разгледната можноста за раздвојување на постапката за овие двајца обвинети, ако до наредната расправа тие не бидат екстрадирани во земјава.
Одбраната на денешното рочиште рече дека Грујевски и Бошковски не се недостапни за судот, туку дека немаат можност да дојдат бидејќи во Грција се води екстрадициска постапка. Постапката, како што посочија адвокатите е во фаза на жалба, за која треба да одлучува Врховниот суд на Грција.
Во предметот „Таргет – Тврдина“ обвинети се поранешниот началник на Петтата управа во МВР Горан Грујевски и вработениот во УБК Никола Бошкоски, кои се во притвор во Грција, поранешната министерка за внатрешни работи Гордана Јанкулоска и поранешниот директор на УБК, Сашо Мијалков, како и поранешниот шеф на неговиот кабинет, Тони Јакимовски.
Истрагата за предметот „Тврдина“ беше отворена на 29 март 2016 година, а за предметот „Таргет“ на 17 ноември 2016 година, а поради нивната поврзаност се споени во еден предмет. Обвинението е подигнато на 30 јуни 2017 година. Според обвинителниот акт, преку три системи за следење на комуникациите во УБК, во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.