Русија ќе протера вкупно 50 британски дипломати. Властите во Москва претходно соопштија дека ќе протераат 23 британски дипломати, реципроцитетно на бројот на руски дипломати кои мораа да ја напуштат Велика Британија. Но, Русија одлучи да протера поголем број, за руските и британските дипломатски мисии да имаат ист број на персонал.
Ова, практично значи дека најмалку уште 27 британски дипломати ќе треба од Русија да се вратат во Лондон.
Британските дипломати имаат рок од еден месец да ја напуштат Москва.
Но, односите меѓу двете земји дополнително се комплицираат по вчерашниот настан на лондонскиот аеродром Хитроу. Авионот на руската компанија Аерофлот, кој летал на реалација Москва – Лондон – Москва синоќа бил претресуван без присуство на екипажот, а капетанот на авионот бил заклучен. Руската амбасада во Лондон соопшти дека овој инцидент е поврзан со „непријателската политика која ја спроведува британската влада кон Русија“.
Односите меѓу Русија и Велика Британија се нарушени по нападот врз двојниот агент Скрипал. Британската влада ја обвини Русија дека стои зад нападот со нервен агенс врз поранешниот двоен агент Сергеј Скрипал и неговата ќерка.