Премиерот Зоран Заев одговарајќи на пратеничко прашање за случајот „Монструм“ за петкратното убиство кај Смилковското езеро порача дека сите прислушувани разговори кои биле поврзани со „Монструм“ се предадени во Специјалното јавно обвинителство.
„За Смилковско езеро ако имаше конкретни докази верувајте, како секоја „бомба“ така и таа „бомба“ ќе ја објавев до крај. Но, таму има сериозни индиции и сите материјали ги предадов во СЈО. Таткото на едно од убиените момчиња имаше можност заради тоа што се родители да види како осомниченото лице Фејзи Азири разговара со тогашниот градоначалник Невзат Бејта молејќи да му бидат исплатени субвенциите и тој тоа го виде, го видоа и сите и така е предадено. Ги виде дури и телефоните што наводно биле скриени. Зошто? Заради тоа што можеби немам право јавно да објавувам вакви податоци, но имам право на некој родител кој изгубил дете тоа да му го покажам“, кажа Заев.
Родителите на убиените заслужуваат дополнителна истрага во овој случај бидејќи има и дополнителни докази што треба да се истражат, додаде Заев.
Toj одговораше на пратеникот од ВМРО ДПМНЕ Зоран Илиоски кој праша дали докaзите во прислушуваните разговори поврзани со „Монструм“ го расветлуваат убиството или во нив има само разговори за субвенции.
„Нема никакво криење така што, апсолутно, поставувањето на ваквите прашања може да бидат само гол популизам, но транспарентноста во водењето на политиките на оваа Влада никој нема да успее да ги одврати. Колку и да е нешто болно, колку и да е нешто тешко граѓаните заслужуваат одговори и од оваа Влада ќе ги добијат сите можни одговори“, рече Заев, и додаде дека како политичар нема да биде истражител или обвинител.
Следното рочиште за „Монструм“ е закажано за 15 мај, кога се очекува пред судот да се појави и обвинетиот Фејзи Азири кој беше во бегство но во меѓувреме е вратен во затвор.
Случајот сега го води СЈО. Обвинителката Фатиме Фетаи, рече дека СЈО ќе стори се за да се дознае вистината за петкратното убиство кај Смилковското Езеро.