Настаните во Собранието од 27 април минатата година се показател за злоупотребата на Министерството за внатрешни работи во партиски цели. Тие немаше да се случат доколку постоеше независна контрола врз министерството. Во изминатите десет месеци, во МВР биле покренати кривични постапки против 33 лица за сторени 36 кривични дела меѓу кои и за злоупотреба на службената положба, за изнуда и за насилство. Дисциплински постапки се поднеле против 291 лице, вработено во МВР.
Ова беше соопштено на денешната дебата на тема „Омбудсманот меѓу специјалните надлежности и капацитетите:Надворешна граѓанска контрола врз работата на полицијата“.
Министерот за внатрешни работи Оливер Спасовски рече дека во минатото во МВР: „Постоела група која била задолжена за бришење на трагите. Група која била политички окупирана, пред се, од високо позиционирани функционери во министерството и затоа ни се случува да имаме случаи за кои неможеме да најдеме докази и да дојдеме до релевантни сознанија бидејќи доказите или ги нема или повеќе не се такви како во време на извршувањето на кривичното дело“.
Со измените на Законот за Народниот правобранител што беше донесен во Собранието во февруарри годинава, надзорна контрола врз полицијата треба да има Омбудсманот, а во обвинителството и во судот да бидат формирани специјализирани одделенија за гонење на полициски службеници за незаконско работење и прекумерна употреба на сила.
„Овој систем не може да биде изигран“ вели Спасовски.
За разлика од министерот, универзитетскиот професор и претседател на Хелсиншкиот комитет, Гордан Калајџиев вели дека не е избран најдобриот модел и изрази револт поради тоа што како што наведе моделот бил избран на затворен состанок во МВР, на идентичен начин како што тоа било сторено со моделот за следење на комуникации.
„Иако ова многу квалитетно го отворивме како прашање, го зтворивме многу набрзина со пропусти во законските решенија“ рече Калајџиев.
Тој истакна дека во моделот за надворешна контрола на полицијата фокусот е ставен пред се на тешките повреди, додека, од друга страна со системот на надзор ќе останат нечепнати случаите со полицијата со кои секојдневно се соочуваат граѓаните.
„Пајак службата е рекет систем за полнење на буџетот. Не може да се крене едно возило освен во случаи кога суштински го блокира сообраќајот кажа Калајџиев.
Народниот правобранител Иџет Мемети истакна дека Омбудсманот и изминатите години активно водел истраги и собирал докази за незаконско постапување на полицијата, кои потоа биле доставувани до Обвинителството и МВР, каде се губеле во фиоките и по нив воопшто не било постапувано.
Како пример го посочи случајот „Сопот“ и уште два случаи, едниот за осуденик, кој бил претепан од затворските службеници, а потоа било кажано дека паднал по скали, а другиот за полицаец кој пред неколку години за партиски цели влегол во училиште и малтретирал ученик, за да ги заплаши останатите ученици да не излезат и да го искажат својот револт против екстерното тестирање.
„Ќе го спомнам случајот „Сопот“. Тогаш омбудсман бил Бранко Наумовски, кој водел одлична истрага и уште тогаш во 2003 година собрал многу докази дека во тој случај имало мачење и дека исказот на сведокот бил даден по присила. колку години поминаа оттогаш за да се потврди дека навистина било така. Доказите се собираат и се слеваат во Јавното обвинителство и таму се губат“рече Мемети.
Од денешната дебата беше упатена порака до институциите за побрзо донесување на измените на законите за Јавно обвинителсво и за судовите, со кои треба да се формираат специјализираните одделенија за гонење на полицајци поради незаконско работење и прекумерна употреба на сила.
Инаку, овие измени се во собраниска процедура и досега требаше да бидат донесени, но беа вратени поради усогласување меѓу работните групи на владејачкото мнозинство и на опозициската ВМРО-ДПМНЕ.