Со презентирање на видео снимки и фотографии од настаните во Собранието од 27 април, минатата година денеска во Кривичниот суд во Скопје, токму на годишнината од насилствата во македонскиот Парламент, продолжи судењето за нападот врз пратеникот Зијадин Села за кој обвинети се десет лица.
На рочиштето досега беа презентрирани две снимки од безбедносните камери во Законодавниот дом, поставени пред влезот во прес-салата, кои се прикажуваат за прв пат во јавноста.
Од снимките можеше да се види кој се влегол во прес-салата, а обвинителот Дарко Јакиимовски ги посочуваше обвинетите, како и и сведоците.
На правата снимка се гледа како надоаѓаат маскирани луѓе со фантомки и качулки на главите, со кои доаѓа и помала група луѓе без маски.
Во тие моменти тогашната пратеничка, а сега министерка за одбрана Радмила Шекеринска и други пратеници, новинари и собраниски службеници набрзина влегуваат во прес-салата. Надвор пред салата остануваат Сашо Тасевски, обезбедувањето на Оливер Спасовски и обезбедувањето на Зоран Заев, Александар Трајков, заедно со неколкумина членови на собраниското обезбедување.
Тогаш се гледаа и првиот физички контакт, односно Тасевски добива удар од луѓето кои надоаѓаат, а дел се со фантомки на главите. Потоа надојдената толпа се повлекува. По неколку секунди повторно се собираат луѓе, кои стануваат агресивни и насилни, бидејки во еден момент се забележува како летнува на подот сефот на собраниското обезбедување.
Моментот на влегување на толпата во прес центарот не е забележан, туку се гледа само како голем број на луѓе се движат во двата правци, кон и надвор од прес центарот, каде што се случи нападот врз пратениците. Кога толпата навлезе во прес центарот, дел од пратениците и новинарски екипи се забележува како успеваат да излезат, односно во последен момент да се спасат од нападот кој се случил потоа. Во еден момент еден од толпата успева да ја помести камерата по што се намалува аголот кој се снима, односно половина од снимката е бел ѕид.
Набрзо следува снимката со изнесувањето на Села од прес-салата, но поради намалениот агол на камерата, се гледа само еден мал дел од овој клучен момент. Сепак обвинителот препозна дел од обвинетите кои го носат Села.
Еден од обвинетите, кога покрај него го носат Села, замавнува со ногата, но не може да се види дали го удира пратеникот или дали воопшто некој друг го удрил. Потоа некој повторно ја поместува камерата и аголот целосно се губи.
По паузата судот ќе продолжи со презентирање и на останатите снимки кој ги поседува обвинителството.
За обидот за убиство на Зијадин Села на 27 април минатата година обвинети се Кире и Цеко Ѓорѓиевски, Оливер Ошавковски, Саша Сенков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра. Обвинетите за обид за убиство на пратеникот Зијадин Села на претходите рочишта се изјаснија за невини.