Манчестер сити е нов рекордер во статистички категории во Премиерлигата, Лигата на шампиони, пак, му бега на Челзи додека Хадерсфилд и математички го обезбеди опстанокот во англиската фудбалска елита за наредната сезона. Ова е епилог по одигрување на заостанатите мечеви од 31. коло и од 35. коло во топ конкуренцијата на Островот.
Граѓаните го победија Брајтон со 3:1 и со најновите три освоени бода стигнаа до бројката од 97 што е за два повеќе од рекордот на Челзи од 2005 година во која „сините“ собраа 95 бода. Со оглед дека до крај на сезоната во Англија има уште едно коло во кое Сити ќе гостува кај Саутемптон, тимот на Пеп Гвардиола има реални шанси да финишира во шампионатот со стотка.
Но, тоа не е единствениот нов рекорд на Манчестер С. Клубот од „Етихад“ веќе има 105 постигнати гола во оваа натпреварувачка сезона што е за два повеќе од Челзи од сезоната 2009/10.
Вонредно активни беа и фудбалерите на Челзи кои одиграа разочарувачки 1:1 како домаќини со Хадерсфилд. Воедно со ремито останаа на петтото место на табелата со 72 бода, два помалку од Ливерпул и четири од Тотенхем и ги расипаа изгледите за пласман во Лигата на шампиони за наредната сезона. Затоа, пак, освоениот бод на „Стемфорд бриџ“ за Хадерсфилд беше рамен на три и со него популарните „териери“ од западен Јоркшир си обезбедија место во Премиерлигата и за наредната сезона.
Премиерлига
Заостанати мечеви од 31. коло и од 35. коло
Челзи – Хадерсфилд 1:1
Манчестер сити – Брајтон 3:1
Лестер – Арсенал 3:1
Тотенхем – Њукасл 1:0
Вест Хем – Манчестер јунајтед (четврток, 20.45 ч.)
Табела: Манчестер сити 97, Манчестер јунајтед 77 (-1), Тотенхем 74, Ливерпул 72, Челзи 70, Арсенал 60, Барнли 54, Евертон 49, Лестер 47, Њукасл 41, Кристал палас 41, Борнмут 41, Вотфорд 41, Брајтон 40, Вест Хем 38 (-1), Хадерсфилд 37, Саутемптон 36, Свонси 33, ВБА 31, Стоук 30.