Американскиот потпретседател Мајкл Пенс синоќа телефонски разговарал со грчкиот премиер Ципрас, само неколку часа откако Грција го одби предлогот Илинденска Македонија.
Од Белата Куќа соопштија дека Пенс „му се заблагодарил на Ципрас за покажаното лидерство, заедно со она на македонскиот премиер Зоран Заев, во нивниот обид да го решат деценискиот спор за името на Македонија. Потпретседателот го охрабри премиерот Ципрас да продолжи да работи со премиерот Заев за взаемно прифатливо решение. Решавањето на овој спор ќе помогне за стабилноста и мирот во регионот“ пишува во соопштението од Белата куќа.
Во соопштението се нагласува и дека Пенс и Ципрас се согласиле дека пред Атина и Скопје се отвора „историска можност да го решат ова прашање“ и оти „времето е од големо значење“.
Грчкиот премиер Ципрас не успеа да обезбеди подршка од лидерите на парламентарните партии за „Илинденска Македонија“ кои го отфрлија предлогот зашто “го зајакнувал иредентизмот“ и побара преговорите да продолжат за да се најде„ взамено прифатливо решение со географска или временска одредница како што предложил медијаторот Нимиц.
На лидерската средба во Скопје, премиерот Заев ги информираше шефот на државата Иванов, претседателот на Собранието Џафери и претседателите на ВМРО ДПМНЕ Мицкоски и на ДУИ Ахмети за последниот предлог за кој се согласиле македонскиот и гркиот премиер на Самитот во Софија. Решението предвидуваше спроведувањето на името за внатрешна употреба да се одвива во фази, како што ќе напредува земјата во членство во ЕУ и да се одржи референдум. Претседателот на ВМРО ДПМНЕ Мицкоски рече дека партијата нема да прифати промена на Уставот, а со цел промена на уставното име. Претседателот Иванов се воздржа од коментар и кажа дека побарал да добие писмен документ кој ќе содржи се она што досега е разговарано во преговорите со Грција, а потоа ќе се произнесе.