По Јужна Африка, Бразил, Русија и Катар, Светското фудбалско првенство во 2026 година ѝ припадна на Северна Америка. Во улога на негови организатори ќе бидат САД, Канада и Мексико чија заедничка кандидатура ја поддржаа 134 делегати на денешниот 68. Конгрес на ФИФА во Москва. Апликацијата на нивниот противкандидат Мароко доби 65 гласа додека еден член се изјасни против.
Северноамериканското трио вети дека ќе домаќин на најлуксузниот турнир во историјата што воедно ќе биде и најмасовно со оглед дека ќе брои 48 репрезентации. Според првичниот план, 60 натпревари ќе се играат на територијата на САД, а останатите 20 ќе бидат поделени меѓу Канада и Мексико. Финалето е планирано во Њу Џерси. Мундијалот во 2026 година ќе биде прв со ко-организатори по 2002 година (Јапонија и Јужна Кореја), но и прв воопшто со тројца домаќини.
Мексиканците по третпат добиваат организација на Светско првенство во фудбал по 1970 година и 1986 година, Американците по вторпат по 1994 година, а Канаѓаните за првпат. Мароканците, пак, извисуваат по петти пат по обидите да бидат домаќини на турнирите во 1994 година, во 1998 година, во 2006 година и во 2010 година.
Наредниот, 69., Конгрес на ФИФА е закажан на 5 јуни догодина во Париз во предвечерјето на Светкото фудбалско првенство во женска конкуренција.