Најава за воведување на класично Светско првенство во тенисот по урнек на кошарката, ракометот, одбојката, ватерполото или како што некои веќе го нарекоа петти гренслем во сезоната. И тоа на сметка на Дејвис купот што важи за едно од најстарите спортски натпреварувања во светот. Промените ќе бидат предложени пред 147 членки на годишното Собрание на Интернационалната Тениска Федерација (ИТФ) што е закажано за утре (16 август) во Орландо. За нивно усвојување се потребни две третини од 460 гласа колку што се вкупно во игра.
Првиот човек на ИТФ, Дејвид Хагерти уште во февруари ги презентира плановите за новото натпреварување за кое најде партнер во инвестициска група на чело со фудбалерот на Барселона, Жерар Пике. Буџетот би бил три милијарди долари за период од 25 години, а премиерното издание на проектот е зацртано за 2020 година.
Квалификациите се замислени во февруари и во нив ќе учествуваат 24 репрезентации. Мечевите ќе се играат по системот дома-гости, 12 победници ќе обезбедат место на завршниот турнир во ноември на кој ќе учествуваат и полуфиналистите од претходната сезона како и две од поразените селекции со покани од ИТФ.
Сите заедно (18 тима) ќе играат на еднонеделен турнир на неутрален турнир во ноември, ќе бидат поделени во шест групи по три, а победниците од секоја конкуренција плус двете најдобри второпласирани селекции ќе продолжат во нокаут фаза (четврт-финале). За разлика од досегашните четири мечеви во сингл и еден во дубл, на СП во тенис ќе се играат два меча во поединечна конкуренција и еден во двојки.
Предложените измени наидоа на поддршка кај претставници на три од четирите гренслеми во сезоната (Ролан Гарос, Вимблдон и Ју-Ес опен), на идејата се противат од Австралија опен. Позитивен став за Светскиот тениски куп има и од Јужна Америка, од Африка и од Азија. Спротивставени мислења, секако, има. Доаѓаат од национални сојузи, од тениски легенди како Лејтон Хјуит и Јаник Ноа, против реформи во Дејвис купот и претседатрелот на Германската тениска федерација, Дирк Хордорф.
„Тоа е убиство на Дејвис купот. Не можете да правите натпреварување што помалку или повеќе е егзибициско, не можете да очекувате да ви дојдат тенисери по завршниот Мастерс во ноември. Сите знаеме колку отсуства има на Мастерсите поради повреди. Новото натпреварување нема смисла. Дејвис купот е скапоцен камен на ИТФ и ако сакаат измени треба да имаат јасен концепт и јасен договор. Вака и членовите на Одборот, на регионалните тениски федерации и големите тениски нации немаат одсговори на поставените прашања“, истакна Хордорф.
Распределбата на гласови во Собранието на ИТФ е следен. Четирите домаќини на гренслем турнири плус Германија имаат по 12 гласа, 14 држави имаат по девет, седум членки имаат по седум, по пет имаат 14 национални сојузи, 25 федерации имаат по три, а останатите 82 по еден.