Постапките за набавка на електронски картички и избор на консултант за ревизија на електронскиот систем за наплата се во согласност со Законот за јавни набавки и се реализирани поради оправдана итност, соопшти генералниот директор на ЈСП „Скопје“ Кристијан Чушков на денешната прес-конференција одговарајќи на информациите објавени во јавноста за начинот на кој се спроведени овие постапки и за самите компании што се избрани.
– Станува збор за две различни постапки, во кои се избрани две различни фирми, во целосно законска постапка. Во текот на постапката согласно закон сме немале обврска да ги споредуваме адресите на кои биле основани овие фирми. Но, дури и да сме ги споределе адресите, согласно закон сме немале право да ги дисквалификуваме фирмите заради тоа што биле основани на иста адреса, додаде Чушков.
Тој објасни дека претпријатието за да спречи евентуален недостиг од овие картички и тоа во пресрет на почетокот на новата учебната година отвориле постапка со преговарање во која учествуваа три понудувачи: ИД Кардс која понуди 120 денари за картичка, Коннектел со 125 денари за картичка и досегашниот добавувач Македонски Телеком со цена од 130 денари по картичка, по што според Чушков е избран најповолниот понудувач.
Додаде дека е лажно тврдењето оти бил направен договор во четири очи. Постапката, како што рече е во целосна согласност со Законот за јавни набавки.
Поради нефлексибилноста на досегашните билети и по укажување на граѓаните, изработуваат нов систем за наплата и валидација на билети. За изработка на квалитетна техничка документација за новиот систем според Чушков бил распишан оглас за консултантски услуги. На овој оглас се јавил само еден понудувач и тој бил избран.
Повеќе медиуми вчера објавија дека две штотуку формирани фирми Идкардс и Ит Плус смарт консалтинг минатиот месец добија два тендери од ЈСП во Скопје, вредни околу 200.000 евра. Според податоците од Централен регистар, тие се регистрирани на адресата „Димо Хаџи Димов“ број 81 кое е и место на живеење на сопственикот и управител на фирмата, кои двете компании ги отворил во рок од една недела со непаричен влог од по 5000 евра.
Ит плус смарт консалтинг е формирана 20 јуни, месец и четири дена по основањето го добила тендерот од ЈСП, вреден 130.000 евра. Истиот сопственик 7 дена подоцна отворил втора фирма Идкардс, која по неполн месе добила бизнис од ЈСП вреден 78.000 евра.