Австралискиот фудбалски клуб Сентрал Коуст Маринерс му понуди професионален договор на осумкратниот олимписки шампион во спринт, Јусеин Болт. Веста што ја обелодени неговиот менаџер Рики Симс ја пренесе и „Би-Би-Си“.
„Можам да потврдам дека Болт доби договор“, изјави Симс.
Од Сентрал Коуст Маринерс, пак, не сакаа да ги коментираат наводите на менаџерот на „молњата од Јамајка“. Тренерот Мајк Малви само истакна дека е свесен за популарноста на приказната на Болт, но не сака да се занимава со шпекулации.
Болт во 2017 година ја заврши атлетската кариера и се насочи кон професионален фудбал што е негова желба од поодамна. Во август оваа година отпатува во Австралија и оттогаш тренира со тимот на Сентрал Коуст Маринерс за кој дебитира минатата недела во пријателски меч и постигна два гола во убедливата победа со 4:0.
Светскиот рекордер во трките на 100 и на 200 метри пред неколку дена одби двегодишна понуда од екипата на Валета на Малта. Покрај тренинзите со Сентрал Коуст Маринерс, Болт досега се докажуваше и во Борусија Дортмунд, во Сандаунс во Јужна Африка и во норвешки Стромсгодсет.