Работнички го повлече првиот потег во зимскиот преоден рок. Раководството на дебармаалци го осигураа првото засилување во зимскиот преоден рок, откако претседателот Драган Поповски и напаѓачот Баже Илијоски си подадоа рака за едногодишна соработка.
Илијоски во изминатата година ги тресеше противничките мрежи за Шкупи. По завршување на договорот со чаирчани, тој почна контакти со „црвените“ од Градски парк што резултираа со договор до крајот на 2019 година.
Неговиот квалитет и искуство, без сомнение, ќе бидат од големо значење за тренерот Жикица Тасевски во пролетниот дел од сезоната и европските амбиции на клубот за летниот период. Илијоски е најдобар стрелец во историјата на македонскиот прволигашки фудбал и во Работнички се враќа по шести пат во кариерата.
Работнички го заврши есенскиот дел од сезоната како четвртопласиран на табелата со 26 бода, четири помалку од Академија Пандев. Лидер е Шкендија со 40 бода, на второто место е Вардар со 35.