Експресна реакција на управата на МЗТ Скопје по повредата на центарот Љубомир Младеновски. По пауза од три и пол години во СЦ „Јане Сандански“ се враќа Предрад Самарџиски кој потпиша договор со „штрковите“ до крај на сезоната и ќе биде големо засилување на екипата под обрачите во обид во борбата за шампионската титула во домашното првенство, но и во мисијата за враќање во елитната АБА конкуренција.
Поранешниот македонски кошаркарски репрезентативец лани беше дел од тимот на Мега Бемакс, а во кариерата играше и за ФМП Железник, за Партизан, за Црвена звезда, за Олин Едерне, за Литвос Ритас, за Мерсин, за Бујукчекмеџе и за Анкара. Последниот настап за националниот тим го имаше на Европското првенство во 2015 година во Загреб.
МЗТ Скопје оваа сезона, покрај во домашната сцена, се натпреварува и во втората АБА лига. По 14 одиграни кола, „штрковите“ се втори на табелата со 23 бода, четири помалку од екипата на Приморска на лидерската позиција која славеше во, последното, 14 коло во Скопје со 78:77. Во наредното, пак, на 9 јануари тимот од СЦ „Јане Сандански“ ќе гостува во Цетиње кај Ловќен.