Конзорциум од две албански компании „Global Technical Mechanichs” и „Bami sh.p.k.” го добија аеродромот во Кукс, град на северот на Албанија, под концесија на 35 години.
Албанското министерство за инфраструктура соопшти дека конзорциумот е избран на тендер што бил доделен деновиве и на кој како единствени понудвачи се јавиле споменатите албански компании.
Новите концесонери се обврзаа да инвестираат околу 8 милиони евра во модернизација на авиопристаништето и негово ставање во функција.
„Во документацијата за тендерот, со цел да ги исполнат условите за искуство, двете компании приложија и договор со холандската компанја „Нако“ која има долга традиција во областа на администрирање и менаџирање на аеродроми во повеќе земји во светот“, соопшти албанското министертво за инфраструктура.
Новите концесонери, меѓу другото, треба да извршат проширување на аеродромската писта, на терминалот за патници, како и на паркинг просторот.
Аеродромот ќе функционира за ниско буџетски летови, а се предвидува да патуваат во просек по 300.000 патници годишно.
Аеродромот се наоѓа на 3,5 километри јужно од Кукс. За негова изградба Обединетите Арапски Емирати вложија 20 милиони долари. Почна да се гради на 10 мај во 2003 година и беше завршен на 31 октомври во 2005 година.