Mногу е подобро кога ќе завршите со победа одошто со пораз, истакна капитенот на македонската ракометна репрезентација, Кире Лазаров по триумфот над Чиле со 32:30 во меч за 15. место на мундијалот во Германија и во Данска.
„Ваквите мечеви се најтешки за играње. Не решаваат за ништо, но многу подобро е, секако, да завршите со победа отколку со пораз и тоа против ривал како Чиле. Оваа победа ни значи, без разлика на се. Многу млади играчи добија шанса, почувствуваа како е да се игра, како е кога мора да се победи“, истакна Лазаров.
Капитенот најави анализа на настапот на репрезентацијата во наредниот период, но укажа и на потребата за уште понапорна работа за поправање на грешките во играта што беа присутни на овој Мундијал. Тој, сепак, изјави дека не е разочаран од играта и дека македонскиот тим има потенцијал.
„Со европските селекции бевме со подеднакви шанси за победа во поголем дел од натпреварите. Не можам да кажам дека сум задоволен, но не сум ни разочаран. Имаме ракометна традиција и ако се зафатиме со работа, имаме голем потенцијал во оваа репрезентација. За одреден период може да се направи селекција која ќе биде рамо до рамо со најдобрите во Европа, заврши Лазаров.
Македонија по победата над Чиле го заврши шампионатот во Германија и Данска на 15. место како и на првенството пред две години во Франција.