Данило Брестовац и офифијално е промовиран за нов селектор на машка ракометна репрезентација на Македонија. На кормилото на националниот тим доаѓа на место на Раул Гонзалез и до јуни ќе биде на уште две работни места – предводник на кадетската селекција и на екипата на Металург. Вели дека е подготвен за новиот предизвик за кој смета дека доаѓа во вистинско време.
„Благодарност до претседателот и до комисијата што одговори позитивно на мојата кандидатура. Искуството од минатото ми дава за право да се надевам за остварување на мојот сон. Подолго време имам соработка со Ракометната федерација на Македонија и мислам дека е нормално да прифатам ваков предизвик. Дел од моите блиски луѓе ми сугерираа дека не е време, но јас мислам дека не е рано. Со некои од момците сум играл, некои сум ги тренирал, па полесно ќе направам фузија на играчите во заминување и оние кои надоаѓаат доаѓање“, вели Брестовац и најави дека за краток период ќе бидат познати и неговите соработници во стручниот штаб.
Тој е прв домашен избор на Ракометната федерација на Македонија (РФМ) по тројцата странци на кои им беа доверени „црвено-жолтите“ во изминатиот период – Ивица Обрван, Лино Червар и Раул Гонзалез. Неговата кандидатура беше прифатена од тричлената комисија и предложена до членовите на Управниот одбор (УО) и покрај ангажманот во Металург, но и покрај заложбата на претседателот Живко Мукаетов за селектор кој ќе биде фокусиран само на репрезентацијата.
„Првичниот договор е до 30 јуни во 2022 година. Покрај работа со сениорската репрезентација, ќе биде координатор и на останатите национални селекции. Имав визија за професионален селектор што ќе стапи на сила по 30 мај бидејќи не сакаме да доведеме до нарушување на клупските односи на Данило со Металург. До 30 мај ќе работи и во клубот, а од 1 јуни ќе биде посветен само на репрезентативни обврски. Ќе остане на чело и на кадетската репрезентација која во август ја очекува настан на Светското првенство во Македонија. Во сите предизвици ќе има максимална поддршка од нас како Федерација“, истакна првиот човек на РФМ, Живко Мукаетов.
Дебито на Брестовац на клупата на македонската репрезентација ќе биде на 10 април во Рејкјавик против Исланд во квалификациите за ЕП 2020. Четири дена подоцна ќе следува и реванш со Исланѓаните во Скопје.