Премиерот Заев вчера имал телефонски разговор со германската канцеларка Ангела Меркел, соопшти владината прес служба.

Тој побарал од Меркел поддршка во врска со одлуката за почеток на преговорите со Северна Македонија која треба да ја донесе Советот на ЕУ во јуни.

„Со оглед на тоа дека државата има статус на земја кандидат за членство во ЕУ од 2005 година, го склучи Договорот од Преспа и постигна резултати во поглед на реформските процеси, време е Советот на ЕУ да донесе позитивна одлука за отворање на пристапните преговори. Оваа одлука ќе претставува дополнително охрабрување за да се продолжи со реформите во Северна Македонија“ рекол Заев.

Владината прес служба наведе дека канцеларката Меркел го поздравила позитивниот развој на спроведувањето на Договорот од Преспа, како и спроведувањето на домашните реформи преку отворен дијалог со опозицијата, што, според неа, ќе донесе конкретни и позитивни резултати.

Двајцата се согласиле дека  посетата на грчкиот премиер Ципрас и заедничката владина седница се  историски момент и дека позитивниот развој на односите меѓу Северна Македонија и Грција ќе биде позитивен пример за регионот на Западен Балкан и тоа се добри вести за Европа.

Заев ја информирал канцеларката Меркел и за други политички настани во државата и за дијалогот со опозицијата во врска со реформите, каде се постигнати конкретни резултати со усвојувањето на нов закон за антидискриминација, формирањето на Антикорупциска комисија, како и реформи во безбедносните служби и јавната администрација. Дијалогот во врска со иднината на Специјалното јавно обвинителство е сѐ уште во тек.

Тој се заблагодарил на поддршката што Германија ја даваше во сите процеси, вклучително и надминувањето на спорот за името со соседна Грција, внатрешните реформи, а особено за економскиот советник што Германија го обезбеди со цел да ѝ помага на Владата.