Термин за фудбал со министрите во Скопје знае да пропушти, но возење мотор во недела не. Премиерот Зоран Заев нема премногу време за спортски активности, но и она малку што го има, вели, се обидува да го искористи максимално со спортски активности што се негова пасија.
„Имам малку време, но и покрај тоа го користам. В недела возам мотор, а во Скопје во четврток играм фудбал со министрите, но не сум редовен. Се надевам дека во иднина ќе имам повеќе време за спортување за да бидам подобро подготвен за секојдневните активности“, порача Заев од Струмица на одбележувањето на Меѓународниот ден на спортот за развој и мир.
Заев ја искористи приликата да потсети на ваучерскиот систем што го воведе Владата, проект преку кој се планира директна помош за спортистите и спортските клубови. По тој основ досега се осигурани шест милиони евра што рамноправно ќе бидат насочени за поттикнување на спортот и со намера за десеткратно зголемување на бројот на учесници кои спортуваат што моментно, според премиерот изнесува 5.000.
И поранешниот премиер Никола Груевски неретко се појавуваше во јавност додека се рекреира со фудбал или возење велосипедот на кејот на Вардар.