Александар Трајковски го постигна шестиот гол во Серија Б во оваа сезона, но Палермо не успеа до сите три бода во дуелот со Падова. Конечни 1:1 на „Ренцо Барбера“ во меч од 32. коло по кој сицилијанците може да жалат за испуштените два против вториот, одзади, на табелата во борбата за директен пласман во Серија А за наредната сезона.
Македонскиот репрезентативец беше стартер, погоди во 14. минута и со Илија Несторовски одиграа цел натпревар за домашните. Трајковски погоди против Падова и во есенскиот триумф на гости со 3:1, а погодови прославуваше и во средбите со Кремонесе, со Фоџа, со Перуџа и со Лече.
https://www.youtube.com/watch?v=ew8xfO5ctRk
Палермо е трет на табелата во Серија Б со 57 бода, шест помалку од Бреша на лидерската позиција и три од Лече на второто место. До крај на основниот дел од сезоната остануваат уште четири кола. Двете најдобропласирани екипи ќе бидат промовирани во нови калчолигаши додека од третото до осмото место ќе играат плејоф за третиот патник во Серија А за сезоната 2019/20.