Лидерот на опозицијата во Венецуела, Хуан Гуаидо прогласи „почеток на крајот на узурпацијата“ по нападот утрово од лица во воени униформи и возила во главниот град Каракас. Тој е на чело на Националното Собрание и во изминатиот период е признат како легитимен претседател од десетици земји во светот и неколку месеци наназад ги предводи протестите против Владата на Николас Мадуро. Но, денеска се реши на најхрабриот потег досега и најави вклучување на армијата за трансфер на власта во земјата и ставање крај на кризата.
Во видеото што е поставено на социјалните мрежи е заедно со Леополдо Лопез, кој важи за уште еден клучен опозициски лик во Венецуела. Снимката, сепак, отвори дилеми со оглед дека Лопез е во домашен притвор и нејасно е неговото присуство во обраќањето на Гуаидо до народот иако опозицискиот лидер порача дека е направена во воената база „Ла Карлота“.
Гуаидо повика на масовни демонстрации на национално ниво на први мај. Обраќањето, како што рече, е нивна најава, а подоцна на „Твитер“ напиша „народот на Венецуела го иницира крајот на узурпацијата. Во моментот сум на средби со главните воени единици на армијата како почеток на последната фаза од операцијата Слобода“.