Ростов и Ѓер ќе играат во финалето во женската ракометна Лига на шампиони. Во полуфиналните мечеви на Фајналфор турнирот во Будимпешта, рускиот претставник го совлада Мец со 27:25 (полувреме: 15:8), а бранителот на титулата беше подобар од норвешки Вајперс Кристијансанд со 31:22 (полувреме: 18:8).
Тимот од Дон за првпат ќе игра во големото финале во второто учество на завршните турнири по ланската елиминација од ЖРК Вардар. Но, за допишување на историја ќе има тешка задача во унгарскиот состав кој го запоседна тронот од 2016/17. Еден од клучните моменти во средбата со Мец беше одбранениот пенал на Мајда Пешоа во финишот. Лидер, пак, во нападот на Ростов беше Ана Вјахирева со седум гола. Најефикасна во натпреварот беше Грајс Заади со девет погодоци.
Ѓер во целост ја оправда фаворитската улога против Вајперс Кристијансанд. На полувреме постави нов рекорд по најубедливо водство на Фајналфор турнирите, а фантастична партија меѓу стативите имаше Амандин Лејно која запиша десет одбрани или 50 отсто од упатените удари кој нејзиниот гол. Кари Братсет беше најефикасен со девет гола, најистакната во поразената екипа беше Емили Арнтсен со пет гола.
Финалето меѓу Ѓер и Ростов е утре попладне (недела, 18 ч.) во „Ласло Пап“ арена во Будимпешта. Вајперс Кристијансанд и Мец од 15.15 часот ќе играат за бронзениот медал.