Ракометарите на Вардар по вторпат ја покорија конкуренција во Лигата на шампиони. Во финалето на годинашното издание на Фајналфор турнирот во Келн, македонскиот првак го совлада унгарски Веспрем со 27:24 (полувреме 16:11). „Црвено-црните“ во полуфиналето беа подобри и од Барселона со 29:27. Во мечот за третото место, Каталонците славеа против Кјелце со 40:35. За најкорисен играч на завршниот турнир во „Ланксес арена“ е прогласен Игор Карачиќ.
Решителноста за успех на вардарци беше видлива од сам почеток. Жарот со кој влегоа момчињата, денеска во бело, се преслика во гранитно цврста одбрана и мирна, трпелива и игра со брзи комбинаторики во напад што носеа сигурни реализации. Двата лоба на Мораеш, неколкуте боречки зафати и голови на Стоилов, асистенциите на Игор Карачиќ, ефектот на Дибиров и Скубе, но и одбраните на Дејан Милосављев влеваа дополнителна самодоверба кај европскиот првак од 2017 година. Малку по малку се одеше во резултатско бегство за пренесување на притисокот и фрустрациите врз унгарскиот шампион. А, како одминуваше времето, така се зголемуваше и залихата на „црвено-црните“ кои на одмор заминаа со одлични плус 5 (16:11).
Продолжението на натпреварот во „Ланксес арена“ беше во знак на тимот на Веспрем кој ја згусна линијата и навреме ги затвораше приодите до Миклер и Штербик. Тоа доведе до топење на минусот во однос на европскиот шампион од 2017 година, но недоволно и за пресврт. Вардар потоа се стабилизира, ја врати концентрацијата, ракометарите ги „оладија“ главите, ако може така да се каже, ги смирија рацете и мудро ја приврши мисијата до крај за еуфорична прослава во Келн меѓутоа и низ кафулињата низ Скопје.
Рожерио Фереира Мораеш беше најефикасен меч во финалето со шест гола, пет пати погоди Иван Чупиќ, четири додаде летонскиот џин, Даинис Кристопанс, по трипати во листата на стрелци се запишаа Игор Карачиќ, Сташ Скубе и Тимур Дибиров, два гола во втората европска круна на Вардар вгради Стојанче Стоилов, еден даде и Данил Шишкарев. Французинот Кентин Мае со шест погодоциго предводеше Веспрем за кој минутажа овојпат доби Дејан Манасков, но не успеа да го совлада Милосављев во двата обида во првото полувреме.
Дел од генерацијата што остава големо богатство и резултат за почит се и фантастичниот голман Дејан Милосављев, неговиот колега Калифа Гедбане, Кристијан Дизингер, Глеб Калараш, Сергеј Горбок, Јања Војводиќ, Дмитри Кисељев и Мартин Поповски.