Активисти од „Ние сме љубовта“ денеска во паркот „Жена борец“ во Скопје ќе одржат симболичен протест за зголемување на свеста за злосторствата во сириската провинција Идлиб и ќе упатат апел за запирање на бомбашките напади врз болници, училишта и невини цивили.
„Ужаснати сме од ескалацијата на насилството и губење на животи на цивили во Идлиб. Воспоставивме успешна соработка со локални и со меѓународни невладини организации за да ги запознаеме луѓето со состојбата таму“, се наведува во соопштението на „Ние сме љубовта“ кои напоменуваат дека во Идлиб над 3.5 милиони деца, жени и мажи се под опасада и се изложени на напади и тешки бомбардирања.
Скопје е еден од 15 градови во Европа каде денеска се одржува ваков симболичен протест, на кој е планирано во истовреме во воздухот да се пуштат илјадници балони како знак на поддршка за Идлиб.
„Ние сме Љубов” упатуваат апел до владите и до меѓународната заедница за преземање мерки за прекин на насилството меѓу завојуваните страни во Сирија и ставање крај на нападите врз училишта и болници, отворање на коридорите за хуманитарна помош за населението како и гаранција дека ќе бидат повикани за одговорни индивидуи и групи, осомничени за воени злосторства и злосторства против човештвото извршени со употреба на хемиско оружје и силувања.