Основното јавно обвинителство Велес поднесе обвининие против осум лица од Кавадарци за фалсификување и пуштање во промет на лажни американски долари и против четворица вработени во банка во Кавадарци за злоупотреба на службена положба и овластување.
Вработените во банката од кои двајца шалтерски работници, раководител и заменик раководител на експозитурата во Кавадарци, примиле и откупиле вкупно 696 лажни банкноти во апоени од по 50 американски долари, во вкупен износ од 34.800 американски долари.
Тие ни рачно ни машински не ги провериле банкнотите за да ја утврдат нивната автентичност, а раководителот на експозитурата и неговиот заменик не извршиле контрола на почитувањето и спроведувањето на прописите на Народната банка за постапување при размена на девизни средства, со што на штета на банката е исплатен вкупен износ од 1.727.545 денари.
Првообвинетиот, како што информираат од ОЈО, во временскиот период од 17 април до 3 мај 2018 година ја искористил деловната соработка со експозитурата на банката во Кавадарци и пуштил во оптек лажни пари – 137 банкноти во апоени од по 50 американски долари.
Банкнотите се разликувале од оригиналните според техниката на печатење, видот на хартијата, техниката на печатење на сериските броеви, водениот жиг, заштитниот конец, оптичката варијабилна боја и неимитираната ИП заштита. Овие банкноти тој ги продал во банката со потврда за купување/продавање ефективни странски пари.
Во истиот временски период, ги поттикнал и другите обвинети од кои петмина се негови роднини да пуштат во оптек лажни пари во апоени од по 50 американски долари.
Тој им дал вкупно 559 вакви банкноти, а откако ги замениле во денари парите ги уплатил на сметка на правните лица кои се во негова сопственост и во сопственост на уште еден од обвинетите.
Обвинителството бара од Судот да ги продолжи мерките на претпазливост за обвинетите – повремено јавување кај определено службено лице во Основен суд Кавадарци и привремено одземање на патна или друга исправа за преминување на државната граница.