Аргентинскиот фудбалер Емилијано Сала (28) и неговиот пилот Давид Иботсон (59) биле изложени на опасно високо ниво на јаглерод моноксид пред падот на авионот во Ла Манш во јануари оваа година, потврдија британските истражни органи. Телото на Сала беше пронајдено по две недели од несреќата додека Иботсон сè уште се води за исчезнат.
Од Секторот за истраги на воздушни несреќи е наведено дека во крвта на Сала се откриени високи концентрации на COHb (комбинација на јаглерод моноксид и хемоглобин), јавува агенцијата „Анадолија“.
Поголемо ниво од 50 отсто на јаглерод моноксид во организмот се смета за опасно по здравјето на поединецот и може да доведе до напади, губење на свест и срцев удар.
Адвокатот на семејството на Сала, Даниел Мечовер истакна дека извештајот отвора многу прашања за несреќата. Трупот на авионот кој исчезна на 21 јануари над Ла Манш беше пронајден на почетокот на февруари во близина на брегот на островот Џернси. Леталото од типот „Пајпер Малибу Н264ДБ“ беше на пат од Франција кон Кардиф, тим во кој аргентинскиот фудбалер направи трансфер од Нант за 17 милиони евра.