Коста Петров познат како автор на популарни книги за самопомош, Пи-ар експерт – работеше во Кабинетот на Арбен Таравари кога беше министер за здравство и Нина Ангеловска – директорка на „Групер“ – фирма за продавање на производи на интернет ќе бидат новите потпретседатели на СДСМ, дознава НОВА.
Изборот на Петров и Ангеловска кои предизвикаа изненадување во јавноста поради фактот дека ниту еден од овие двајца млади луѓе досега не се занимавал со политика, се очекува да биде потврден вечерва на седницата на Централниот одбор на партијата.
На вечерашната седница на Централниот одбор на СДСМ велат изворите на НОВА се очекува Нина Ангеловска – директорката на „Групер“ да биде предложена и за нов министер за финансии. Таа ја прифатила понудената позиција.
Ангеловска е предложена за министер за финансии по укажувањето од Антикорупциската комисија дека премиерот Заев не може да биде и претседател на Влада и министер за финансии.
Освен Петров и Ангеловска за потпретседател на СДСМ ќе биде предложена и министерката за труд Мила Царовска – една од најпопуларните министерки во Владата на Заев.
За потпретседатели ќе бидат предложени и министрите Оливер Спасовски и Дамјан Манчевски и пратеникот Мухамед Зеќири, кои и досега ја извршуваа функцијата – потпретседател на партијата.
Фросина Ременски која беше во високото раководство на Меѓународниот сојуз на Боки 13, а која беше потпретседател на партијата, нема повторно да биде предложена за партиска функција.
И градоначалниците на Скопје и на Штип, Шилегов и Бочварски кои исто така беа потпретседатели нема да бидат повторно именувани.
По завршувањето на претседателските избори и најавена чистка, Заев ги смени сите претседатели на општинските организации и партиските потпретседатели. Во меѓувреме именуваше околу 40 нови претседатели на општинските организации, а беа избрани и 16 нови членови на Извршниот одбор.