Селекторот на младата фудбалска репрезентација на Македонија, Благоја Милевски е генерално задоволен од ефектот во двата октомвриски меча во квалификациите за Европското првенство во 2021. На трите бода од Подгорица во четвртокот, надежи додадоа уште еден по ремито (1:1) на домашен терен со Казахстан и со вкупно седум се трети на табелата во шестата група.
„Не е лошо. Освоивме четири бода во дуели со два ривала за место на завршниот турнир и не сме минус. Мечот со Црна Гора остави трага на физички план против Казахстан чија репрезентација не е наивна. Против неа и останатите во групата не се наиграа. И Шпанија не направи повеќе од три шанси против нив, ние ги имавме седум. Немам што да забележам на момците. Одиграа како што се договориме, а голот што го примивме дојде по пад на концентрација“, рече Милевски во сумирање на заклучоците по мечот со Казахстан.
Милан Ристовски во 20. минута обезбеди предност за македонската репрезентација што гостите го поништија со среќниот погодок на Омиртаев во 75. Резултатот до крајот остана непроменет, а Милевски по мечот се осврна и на недостатоците на генерацијата што моментно ја предводи. Ја истакна недоволната минутажа што играчите ја имаат во своите клубови, а во мечеви како оној пред пет дена и последниот и тоа како е потребна максимална физичка подготвеност и настапи.
„Фудбалерите мора да дадат се што е во нивна моќ и да се изборат за поголема минутажа во клубовите за кои играат. За вакви мечеви не треба 100 отсто туку 120 отсто физичка подготовка. Но, со оглед на фактичката слика, нормално е да дојде до пад и во концентрацијата“, додаде менаџерот кој пред две години ја водеше Македонија на завршниот турнир во Полска.
Македонските млади фудбалери во наредниот месец ги очекуваат два гостувања кај дијаметрално различни противници. На 14 ноември ќе играат против Шпанија на стадионот „Санто Доминго“ во Алкоркон, а пет дена подоцна во Торшавн ќе го одиграат реваншот со Фарски Острови. „Црвената фурија“ е лидер во групата со 9 бода од три меча, Казахстан и Македонија имаат по 7 на второто, односно, третото место, Израел е четврти со 6 бода, Црна Гора има три на претпоследната позиција, на „фенерот“ се Фарски Острови без освоен бод.