Крајот на сезоната значеше и крај на тениската кариера на Чехот Томаш Бердих. Одлуката за повлекување од АТП турот ја донесе во 34. година од животот и требаше да ја соопшти во сабота навечер на завршниот Мастерс во Лондон, но информацијата заврши во, речиси, сите чешки медиуми.
„Ако сакате изненадување, не следете медиуми и социјални мрежи иако знам дека тоа е тешко во денешно време. Се случи мала грешка. Планирав да биде мало изненадување за сабота во Лондон, но сега е невозможно тоа. Ништо повеќе нема да објавувам. Се гледаме во сабота“, напиша Бердих на својот Твитер налог.
Неговиот татко Мартин претходно за весникот „Блеск“ потврди дека Томаш во придружба на сопругата ќе отпатува во Лондон.
„Мислам дека ќе биде одлична прилика за простување со тенисот“, истакна Мартин Бердих.
Ваквата одлука на Томаш Бердих, горе-долу, беше јасна и се насетуваше по Ју-Ес опен. Беше елиминиран уште во првото коло по што нагласи дека не е реално да игра и во 2020 година. Години наназад се мачеше со хронична повреда на левиот колк поради што едвај играше лани и во оваа година.
Бердих се повлекува од професионалниот тенис со заработувачка од преку 30 милиони долари, 13 турнирски победи во поединечна конкуренција, две во двојки и со две титули во Дејвис купот во 2012 година и во 2013 година.